«Նախ կորոնավիրուսը, ապա պատերազմը մեզ ավելի մոտեցրին գլոբալ աշխարհին: Մահաբեր վարակի բուժումն ինքնին մի պետության, այն էլ փոքրիկ Հայաստանի ուժերից վեր կլիներ, եթե մենք չօգտվեինք համաշխարհային մտքից ու ռեսուրսներից: Իսկ Սիրիայում, Իրաքում, Լիբանանում ընթացող պատերազմները, որոնց հետեւում էինք լուրերով, մեզ անչափ հեռու էին թվում, եւ միայն 2020-ի աշնանը պարզ դարձավ, որ այն կարող է նաեւ մեր դուռը բախել: Աշխարհը, իրոք, ավելի գլոբալ, ավելի փոխկապակցված ու միասնական է դառնում, բառի ե՛ւ լավ, ե՛ւ վատ իմաստներով: Իսկ փոքրիկ ու չկայացած պետություններն ավելի ու ավելի մեծ կախման մեջ են հայտնվում հզորներից:
