Zinvor.info-ն հայտնում է, որ այս մասին Ազգային ժողովի պատգամավոր Տուրալ Գյանջալիևը հայտարարել է խորհրդարանի այսօրվա լիագումար նիստում ունեցած ելույթի ժամանակ։

Նա նշել է, որ շուրջ 30 տարի ԵԱՀԿ Մինսկի խումբը դարձել էր դիվանագիտական ձախողման և երկերեսանիության խորհրդանիշ։

«Նախ նշեմ, որ նախագահ Իլհամ Ալիևի՝ Զանգիլանում ունեցած ելույթը պարզապես խոսք չէր, այլ քաղաքական դատավճիռ՝ ուղղված հին միջազգային դիվանագիտական համակարգին։ Համազգային առաջնորդ Հեյդար Ալիևի ծննդյան օրը ժողովրդին դիմելով՝ պետության ղեկավարը բացահայտ ցույց տվեց, որ Ադրբեջանն արդեն անցել է մի փուլ, երբ ինքն է որոշում իր անվտանգության և տարածաշրջանային ապագայի պայմանները։ Այն ժամանակ, երբ ԵԱՀԿ Մինսկի խումբն արդեն պաշտոնապես լուծարվել է և դե յուրե դադարեցրել իր գործունեությունը, կարելի է բացահայտ ասել, որ դրա նպատակը երբեք էլ հակամարտության լուծումը չի եղել։ Համանախագահները միայն փորձում էին սառեցնել իրավիճակը և օրինականացնել օկուպացիան, իսկ մեր ժողովրդին ներշնչում էին, թե իբր այս հակամարտությունը «ռազմական լուծում չունի»։ Սա հոգեբանական ճնշման ձև էր։ Երեսուն տարի տևած «դիվանագիտական տուրիզմի» ընթացքում միջնորդները մեր տարածաշրջանից անգամ մեկ օկուպացիոն զինվոր չհանեցին։ Երբ մեր քաղաքները ջնջվում էին երկրի երեսից, իսկ մզկիթները վերածվում էին ավերակների, նրանք լռում էին»։

Պատգամավորի կարծիքով՝ նախագահի հայտարարությանը առանձնահատուկ սրություն էր հաղորդում այն հանգամանքը, որ լուծարված խմբի համանախագահներ ԱՄՆ-ը, Ֆրանսիան և Ռուսաստանը միջուկային տերություններ են, ինչպես նաև ՄԱԿ-ի Անվտանգության խորհրդի մշտական անդամներ։

«Չնայած աշխարհում ունեցած մեծ ազդեցությանը՝ նրանք երեսուն տարվա ընթացքում նույնիսկ անտեսեցին իրենց իսկ ընդունած բանաձևերը։ Մենք բախվեցինք միջազգային իրավունքի նկատմամբ բացահայտ ընտրողական մոտեցման. մեծ տերությունները ապահովում են միայն այն որոշումների իրականացումը, որոնք համապատասխանում են իրենց աշխարհաքաղաքական շահերին։ 2020 թվականին Ադրբեջանը համաշխարհային մասշտաբով նախադեպ ստեղծեց. մենք միայնակ ապահովեցինք ՄԱԿ-ի Անվտանգության խորհրդի բանաձևերի իրականացումը՝ զինված ուժի և քաղաքական կամքի շնորհիվ։ Հենց այդ պատճառով էլ այսօր ԵԽԽՎ-ի և Եվրոպական խորհրդարանի նման կառույցները, ընդունելով աբսուրդային բանաձևեր և փորձելով կիրառել անհիմն պատժամիջոցներ, փորձում են «պատժել» մեզ»։

Հիշեցնելով, որ ներկայումս Զանգիլանում ավերակների փոխարեն ստեղծվում է նոր աշխարհատնտեսական հանգույց՝ Տ. Գյանջալիևը ընդգծել է նախագահի հայտարարությունը, ըստ որի՝ այդ շրջանը կվերածվի միջազգային տրանսպորտային հանգույցի։

«Այս նոր ճարտարապետության հիմնական տարրը կլինի Զանգեզուրի միջանցքը, որը կկապի Ադրբեջանի հիմնական հատվածը Նախիջևանի հետ և կդառնա Միջին միջանցքի մի մասը։ Սա խաղաղություն է, որը կառուցվում է մեր պայմաններով։ Մենք թույլ չենք տա, որ որևէ մեկը մեզ պարտադրի ստատուս-քվո։ Հարավային Կովկասի արտաքին կառավարաման ժամանակաշրջանն ավարտվել է։ Ադրբեջանը ապացուցեց, որ արդարությունը վերականգնվում է ոչ թե խոսքով, այլ գործնական քայլերով։ Մեր ուղերձը աշխարհին չափազանց հստակ է. մենք պատրաստ ենք խաղաղության, առաջարկում ենք համագործակցության օրակարգ, սակայն քանի դեռ Հայաստանում կենդանի են ռևանշիզմի գաղափարները, մենք զգոն կմնանք։ Զանգիլանն այսօր խորհրդանիշն է այն օրինական տիրոջ, որը վերադարձել է իր հող՝ ոչ թե ավերելու, այլ կառուցելու համար»։