Ինչպես հայտնում է Zinvor.info-ն՝ Պետական սահմանապահ ծառայության գնդապետ, Հայրենական պատերազմի հերոս Բաբեք Ալեքպերովը պատմել է, որ պատերազմի ժամանակ Սոլթանլը-Ամիրվարլը ուղղությամբ գիծը ճեղքելուց հետո, Պետական սահմանապահ ծառայության զինծառայողները պլանի համաձայն՝ սկսեցին առաջ շարժվել Արազի երկայնքով։

«Այս մարտերի ընթացքում մենք թշնամուց ազատագրեցինք Դալիդաղի լեռնաշղթան։ Դա եղել է ամենակարեւոր գործողություններից մեկը։ Դալիդաղի լեռնաշղթան գրավելուց հետո, ոչնչացրեցինք Արազի ուղղությամբ շարժվող հայերի տեխնիկան ու կենդանի ուժը։ Մենք այստեղ դարանակալվեցինք և ջախջախեցինք թշնամուն։ Այնուհետև մեր խմբերը անցկացրին որոնումներ և մաքրումներ։ Տարածքը թշնամուց ամբողջությամբ մաքրելուց հետո հնագույն Խուդաֆերինի կամրջի վրա ծածանվեց մեր դրոշը, և ես այդ մասին զեկուցեցի Գերագույն գլխավոր հրամանատար Իլհամ Ալիևին»։

Պետական սահմանապահ ծառայության սպա Գուրբան Գուրբանովը նույնպես մասնակցել է Խուդաֆերինի կամրջի ազատագրման մարտերին։

Նրա խոսքով, ինքը մարտի մեջ է մտել Խոջավենդի շրջանի Հադրութ գյուղում. «Այնուհետև մարտական առաջադրանքը փոխվեց։ Մեզ հանձնարարվել էր թշնամուց ազատագրել Ջաբրայիլի շրջանի Շուքյուրբեյլի, Սոլթանլը, Խուդաֆերին գյուղերը, Զանգիլան քաղաքը և հարակից տարածքները։ Դեպի Խուդաֆերինի կամուրջ մենք շարժվեցինք Սոլթանլը գյուղից։ Գրավել էինք ռազմավարական բարձունքները և ուղեկալները։ Արդյունքում Խուդաֆերինի կամուրջը մաքրվեց հայերից։ Այն բանից հետո, երբ այստեղ բարձրացրինք մեր դրոշը, եկավ հաջորդ հանձնարարությունը։ Ես և Հայրենական պատերազմի շեհիդ Մուհամեդալի Ալեքպերովը վերադարձանք ելման կետ։ Այս տարածքում ղեկավարության ցուցումով տեղակայվեցին օպերատիվ գործողության գումարտակներ։ Հաջորդ ուղղությունը Զանգիլան քաղաքն էր։ Քաղաքը թշնամուց ազատագրվելուց հետո, շեհիդներ դարձան Հայրենական պատերազմի հերոսներ՝ Ազեր Յուսիֆլին, Մուհամմեդալի Ալեքպերովը, Միրաղա Գասըմովը, Աշուր Ջամիևը և Խուդայար Յուսիֆզադեն։ Թող Ալլահը հանգստություն տա մեր բոլոր շեհիդների հոգիներին»:

Պետական սահմանապահ ծառայության մեկ այլ սպա Սանան Միրզալիևը պատմեց, որ Խուդաֆերինի կամուրջը հայերից ազատագրելուց հետո զորամասերի հետ միասին շարժվել են Զանգիլանի ուղղությամբ. «Ինչպես գիտեք, սա պատմության մեջ մտավ որպես կայծակնային հարձակում 44-օրյա Հայրենական պատերազմում։ Հետո թշնամուց մաքրեցինք Զանգիլան քաղաքն ու հարակից տարածքները։ Թեեւ մենք այլ մարտերում շեհիդներ ունեցել ենք, սակայն Խուդաֆերինում զոհեր չեն եղել»։