Պատրիարք Կիրիլը չորեքշաբթի Դանիլովի վանքում եռակողմ բանակցություններ է վարել Ամենայն Հայոց կաթողիկոս Գարեգին Երկրորդի եւ Կովկասի մահմեդականների վարչության նախագահ շեյխ-ուլ-իսլամ Ալլահշուքյուր Փաշազադեի հետ: Նախօրեին պատրիարքը հանդիպել էր նրանցից յուրաքանչյուրի հետ առանձին:

«Մենք կոչ ենք անում պարզաբանել անհայտ կորածների ճակատագիրը, հեշտացնել ռազմագերիների ազատ արձակման գործընթացը եւ կանխել զենքի չարտոնված օգտագործումը, որը սպառնում է խաղաղ բնակիչների կյանքին»,- ասվում է հոգեւոր առաջնորդների եզրափակիչ հայտարարության մեջ:

Նրանք նաեւ կոչ են արել հարգել պաշտամունքային օբյեկտները, գերեզմանոցները եւ պատմական հուշարձանները Ղարաբաղում:

«Կովկասը միշտ հայտնի է եղել իր ժողովուրդների, լեզուների եւ մշակույթների հսկայական բազմազանությամբ: Ադրբեջանցի եւ հայ ժողովուրդների համար միասին ապրելուց բացի այլ ապագա չկա: Այսօր հատկապես կարեւոր է վերականգնել մարդկանց վստահությունը միմյանց նկատմամբ, կրկին սովորել հարեւանին ընկալել հարգանքով եւ փոխօգնության պատրաստակամությամբ: Նման կոչի բանալին կրոնական սրբավայրերի, պատմական հուշարձանների եւ գերեզմանատների նկատմամբ հարգանքն է, այլ հավատքի մարդկանց կրոնական զգացմունքների հարգանքը եւ հանգուցյալների հիշատակի հոգատար պահպանումը: Կրոնական առաջնորդներին կոչ է արվում օգտագործել իրենց հեղինակությունը՝ կրոնների եւ ժողովուրդների միջեւ բարիդրացիական մթնոլորտ ստեղծելու եւ պահպանելու համար»,-ասվում է ուղերձում:

Նրանք նաեւ կոչ են արել երիտասարդներին հրաժարվել արմատականությունից եւ ագրեսիայից, ինչպես նաեւ խուսափել ատելության խոսքից եւ Ղարաբաղում ռազմական գործողությունների վերսկսման կոչերից:

«Ապագայում անհրաժեշտ է ամբողջ ուժով ձգտել խուսափել ատելության լեզվից, ձեռնպահ մնալ հակամարտության գոտում ռազմական գործողությունների կոչերից: Մենք երիտասարդներին կոչ ենք անում չտրվել ագրեսիայի եւ արմատականության ոգուն, առաջին հերթին խաղաղություն փնտրել»,- ասել են հոգեւոր առաջնորդները: