Իր ելույթի ժամանակ Սիմոնյանը հայտարարել է, որ իբր ադրբեջանական կողմը խախտել է հրադադարի ռեժիմը։ Իր հերթին, Գաֆարովան հանդիպման ավարտին ելույթ է ունեցել՝ հստակեցնելու Բաքվի դիրքորոշումը։

«Ադրբեջանի կողմից հրադադարի ռեժիմի ենթադրյալ խախտման մասին տեղեկությունը բացարձակապես չի համապատասխանում իրականությանը… Հայկական անօրինական զինված կազմավորումների անդամները, որոնք ապօրինի մուտք են գործել Ադրբեջանի ինքնիշխան տարածք, փորձել են հերթական դիվերսիա իրականացնել ադրբեջանական բանակի ստորաբաժանումների դեմ, և մեր զինված ուժերի գործողությունների արդյունքում նրանք ստիպված են եղել նահանջել»,- ասել է նա։

Նրա խոսքով՝ Ադրբեջանը հավատարիմ է 2020 թվականի նոյեմբերի 10-ի եռակողմ հայտարարությանը և չի խախտել դրա դրույթները։ «Հայտարարության դրույթները խախտում է ոչ թե Ադրբեջանը, այլ Հայաստանը»,- ընդգծել է նա։

Գաֆարովան պահանջել է նաև «հայկական բանակի մնացորդների և հայկական անօրինական զինված կազմավորումների ամբողջական դուրսբերում Ադրբեջանի տարածքից»։ Նա նշել է, որ Ադրբեջանը Հայաստանին է հանձնել բոլոր ռազմագերիներին՝ համաձայն եռակողմ հայտարարության։ Նրա խոսքով՝ Հայաստանի զինված ուժերի զինծառայողները, որոնք 2020 թվականի նոյեմբերի 10-ի հայտարարությունը ստորագրելուց հետո մտել են Ադրբեջանի տարածք, Ժնևի կոնվենցիայի համաձայն չեն ճանաչվում որպես ռազմագերիներ և ենթակա են քրեական պատասխանատվության։