Ինչպես հաղորդում է Zinvor.info-ն, վեբինարին ելույթ ունեցող, Միջազգային հարաբերությունների վերլուծության կենտրոնի խորհրդի նախագահ Ֆարիդ Շաֆիևը նշել է, որ եթե ավելի վաղ այս ամսաթիվն Ադրբեջանում ընկալվում էր որպես ողբերգություն, ապա այժմ դա ազգային հպարտություն է։ .

Նրա խոսքով, Թուրքիայի քաղաքական աջակցությամբ՝ 2020 թվականի նոյեմբերին Ադրբեջանի հաղթանակից հետո փոխվել է տեսակետը պատմական իրադարձությունների, այդ թվում՝ հունվարի 20-ի դեպքերի նկատմամբ։

Ֆ.Շաֆիևը նշել է, որ այն ժամանակ նմանատիպ իրադարձություններ տեղի ունեցան Ղազախստանում, Վրաստանում, Ադրբեջանում, այնուհետև Լիտվայում. «Այս բոլոր իրադարձություններից հետո, Խորհրդային Միությունում ապրող ժողովուրդների պայքարի արդյունքում միությունը փլուզվեց։ Այս իրադարձությունների մեղավորները դեռ քրեական պատասխանատվության չեն ենթարկվել։ Նրանցից մի քանիսը այլևս ողջ չեն։ Չնայած դժվարություններին, Ադրբեջանը պետք է շարունակի պայքարը, որպեսզի հունվարի 20-ի իրադարձություններին միջազգային քաղաքական ու իրավական գնահատական տրվի։ Միջազգային հանրությունը դեռ դրան պատշաճ գնահատական չի տվել։ Այս իրադարձությունների մեղավորը Նոբելյան մրցանակ ստացած Միխայիլ Գորբաչովն էր։ Մենք պետք է բարձրաձայնենք այս մասին։ Ադրբեջանը պետք է անընդհատ խոսի այս մասին։ Միջազգային իրավունքում մարդկության դեմ հանցագործությունների արդարացում չկա: Անգամ 50 տարի անց, հանցագործ արարքի համար կարելի է քրեական գործ հարուցել: Ադրբեջանը հունվարի 20-ի իրադարձությունները պետք է քննարկի նաև աշխարհաքաղաքական համատեքստում»։