Ինչպես հաղորդում է Zinvor.info-ն, Բաքվի ռազմական դատարանում դատավոր Զեյնալ Աղաևի նախագահությամբ և դատավորներ Ջամալ Ռամազանովի ու Անար Ռզաևի (պահեստային դատավոր՝ Գյունել Սամեդովա) կազմով անցկացված դատական նիստում մեղադրյալներից յուրաքանչյուրին տրամադրվել է թարգմանիչ այն լեզվով, որին նրանք տիրապետում են, ինչպես նաև պաշտպանության համար փաստաբաններ։

Դատական նիստին մասնակցել են մեղադրյալները, նրանց պաշտպանները, որոշ տուժողներ, նրանց իրավահաջորդներն ու ներկայացուցիչները, ինչպես նաև պետական մեղադրանքին աջակցող դատախազները։

Դատավոր Զեյնալ Աղաևը տուժողներին, որոնք առաջին անգամ էին մասնակցում դատավարությանը, ներկայացրել է դատարանի կազմը, պետական մեղադրանքը ներկայացնող դատախազներին, թարգմանիչներին և գործընթացի այլ մասնակիցներին, ինչպես նաև բացատրել է նրանց օրենսդրությամբ սահմանված իրավունքներն ու պարտականությունները։

Տուժող Իլգար Ահմեդովը իր ցուցմունքում նշել է, որ 2022 թվականին Ջաբրայիլի շրջանի Մեհդիլի գյուղում պայթել է ականի վրա և վնասվածք է ստացել, որի հետևանքով անդամահատվել են նրա ձեռքի երեք մատները։

Մուրսալ Օրուջլուն ցուցմունքներում պատմել է, որ վիրավորվել է Հարամիի դաշտում՝ 2016 թվականի ապրիլյան մարտերի ժամանակ։

Զահիր Զեյնալովը իր ցուցմունքներում պատմել , որ 2016 թվականի ապրիլի 2-ին, զինվորական ծառայության ժամանակ, վիրավորվել է Գերանբոյի շրջանի Թափգարագոյունլու գյուղում՝ Հայաստանի զինված ուժերի կողմից արձակված արկի պայթյունի հետևանքով։ Տուժողը նշել է, որ միջադեպի պահին՝ Հայաստանի զինված ուժերը տարբեր տրամաչափի հրաձգային զենքերից և հրետանային արկերով հրետակոծել են իրենց դիրքերը։