Ինչպես հաղորդում է Zinvor.info-ն, այս մասին ասված է Ադրբեջանի ԱԳՆ-ի՝ տարվա արդյունքների վերաբերյալ զեկույցում։

«Բաց հարցերի թիվը զգալիորեն կրճատվել է։ Տարվա ընթացքում դրական արդյունքներ են արձանագրվել սահմանների սահմանագծման և սահմանազատման ոլորտում։

Ադրբեջանի և Հայաստանի սահմանազատման հանձնաժողովների ձեռք բերված պայմանավորվածության համաձայն՝ իրականացվել է մինչև 13 կմ պետական սահմանի սահմանագծում և սահմանազատում և ապահովվել նախկինում օկուպացված Բաղանիս Այրըմ, Աշաղը Ասկիփարա, Խեյրիմլի և Գըզըլհաջըլը գյուղերի վերադարձը։ Մյուս կարևոր առաջընթացը սահմանազատման հանձնաժողովների դրույթների համաձայնեցում էր, ինչը կարևոր նշանակություն ունի գործընթացն առաջ մղելու տեսանկյունից, քանի որ այս փաստաթղթերը կարգավորում են հանձնաժողովների համատեղ աշխատանքը հաջորդ փուլում։

Դրանով հանդերձ, հայկական կողմի՝ Սահմանադրությունը և տարածքային պահանջներ պարունակող այլ իրավական ակտերը փոխելու քաղաքական կամք չդրսևորելը, ինչպես նաև այդ երկրում պահպանվող ռևանշիստական միտումները, օտար ուժերի անմիջական աջակցությամբ նրա արագ սպառազինումը, լրջորեն խոչընդոտում են կարգավորման գործընթացի ավարտին: «Հայաստանի դիրքորոշումը նախկին ԵԱՀԿ Մինսկի գործընթացի ինստիտուտների պահպանման վերաբերյալ, որոնք կորցրել են իրենց արդիականությունն ու ֆունկցիոնալությունը ներկայիս նոր իրողություններում, կասկածի տակ է դնում այդ երկրի հավատարմությունը կարգավորման օրակարգին»,- ասվում է զեկույցում։

Արտաքին քաղաքական գերատեսչությունում ընդգծել են, որ արտատարածաշրջանային ուժերի կողմից Հայաստանին զինելը, ինչպես նաև Ադրբեջանի դեմ տարվա ընթացքում տարբեր միջազգային հարթակներում իրականացված անհիմն զրպարտչական արշավը լուրջ խոչընդոտներ են ստեղծել բանակցային գործընթացի տրամաբանական ավարտի համար։ Այս քարոզարշավը, որը լայն տարածում գտավ COP29-ի նախաշեմին, հաջողությամբ չեզոքացվեց ադրբեջանական կողմի համակարգային, հետևողական և նպատակաուղղված քայլերի արդյունքում: