Ինչպես հայտնում է Zinvor.info-ն, Ադրբեջանում նույնպես լայնորեն նշվում է Կանանց օրը։

Ինչպես նախորդ տարիներին, այս տարի ևս նախագահ Իլհամ Ալիևը շնորհավորել է ադրբեջանցի կանանց՝ Կանանց միջազգային օրվա կապակցությամբ։

Ադրբեջանում միշտ հատուկ հարգանքով են վերաբերվել կանանց։ Ադրբեջանցի կանայք ակտիվ մասնակցություն են ունենում երկրի սոցիալ-տնտեսական և հասարակական-քաղաքական կյանքում։

Պաշտոնական վիճակագրության համաձայն՝ 2024 թվականի սկզբին կանայք կազմել են Ադրբեջանի ընդհանուր բնակչության 50,2%-ը։ Նախորդ տարի ծնված 112,6 հազար նորածիններից 46,9 տոկոսը աղջիկներ են։ Պետական ծառայողների շրջանում կանանց տեսակարար կշիռը կազմում է 29,4 տոկոս, իսկ մասնավոր ձեռներեցների՝ մոտ 22,7 տոկոսը։

Միլլի Մեջլիսում նույնպես կին պատգամավորների թիվն աճում է։ Եթե 1990 թվականին կանայք կազմում էին պատգամավորների ընդհանուր թվի 4,3 տոկոսը, իսկ 2000 թվականին՝ 10,7 տոկոսը, ապա այսօր կին պատգամավորների տեսակարար կշիռը երկրում հասել է 17,9 տոկոսի։

Միաժամանակ, հանրապետության հանրակրթական ուսումնական հաստատություններում ուսուցիչների 82,7 տոկոսը, միջին մասնագիտական ուսումնական հաստատություններում՝ 79,4 տոկոսը, բարձրագույն ուսումնական հաստատություններում՝ 58,7 տոկոսը և բժիշկների երկու երրորդը կազմում են կանայք։