Ինչպես հաղորդում է Zinvor.info-ն, այս մասին ասված է Արևմտյան Ադրբեջանի Համայնքի հայտարարության մեջ։

«Ե՛վ կառավարության պաշտոնյաները, և՛ կոնգրեսականները, ովքեր ելույթ ունեցան լսումներին, հանդես եկան տարածաշրջանում խաղաղությանը խոչընդոտող և թշնամանք հրահրող հայտարարություններով: Ակնհայտ է, որ ԱՄՆ-ը լրջորեն մտահոգված է տարածաշրջանում խաղաղության հեռանկարով, որն առաջացել է Ադրբեջանի ինքնիշխանության և տարածքային ամբողջականության վերականգնմամբ։ ԱՄՆ պաշտոնյաների հայտարարությունների ապակառուցողականությունը տեսանելի է դրանց բովանդակության մեջ, որը հակասում է միջազգային իրավունքին և կրում է զրպարտիչ և էթնիկական խտրականության բնույթ»,- ասված է հայտարարությունում:

Համայնքը հիշեցնում է, որ ԱՄՆ Կոնգրեսը երբեք Ադրբեջանին նվիրված լսումներ չի անցկացրել, աչք է փակել ավելի քան մեկ միլիոն ադրբեջանցիների բռնի տեղահանման վրա, որոնցից 300 հազարը վտարվել է Հայաստանից, ինչպես նաև բազմաթիվ ջարդերի և ադրբեջանցիների նկատմամբ Հայաստանի կողմից իրականացվող այլ անմարդկային գործողությունների վրա։

«Կուզենայինք պարոն Օ Բրայենին հիշեցնել, որ ՄԱԿ-ի կանոնադրությամբ արգելված ուժի կիրառմամբ զբաղվում են Հայաստանը և Միացյալ Նահանգները: Ամերիկյան կողմը ոչ միայն պետք է աջակցի այն միջոցներին, որոնք Ադրբեջանը ձեռնարկել է որպես իր ինքնապաշտպանության իրավունքի մաս, այլ նաև սովորի Ադրբեջանից, թե ինչպես խուսափել այդ գործընթացում խաղաղ բնակչությանը և քաղաքացիական ենթակառուցվածքներին վնաս պատճառելուց։

Օ Բրայենի խոսքերը Իրանի տարածքով Նախչըվանի Ինքնավար Հանրապետության հետ տրանսպորտային կապերի զարգացմանն ուղղված Ադրբեջանի ջանքերի մասին միջամտություն է Ադրբեջանի ինքնիշխանությանը և ներքին գործերին: Այս ամենը վկայում է այն մասին, որ ԱՄՆ-ը, ձգտելով իրականացնել իր նենգ ծրագրերը տարածաշրջանում, իբր խաղաղության պատրվակով, իրականում հակադրվում է դրան»,- նշել են համայնքում։