Ինչպես հայտնում է Zinvor.info-ն, Ռազմական խորհրդի նախագահ, ներքին գործերի փոխնախարար, ներքին զորքերի հրամանատար Շահին Մամեդովը հանդիպմանը հայտարարել է, որ ՆԳՆ ներքին զորքերի անձնակազմը անցած մեկ տարում. կատարել է առաջադրված բոլոր խնդիրները՝ ապահովելու ռազմավարական օբյեկտների անվտանգությունն ու պահպանությունը։ Նա ընդգծել է, որ ազատագրված տարածքներում բոլոր խնդիրները նույնպես կատարվել են։

Այնուհետև Ներքին զորքերի հրամանատարի առաջին տեղակալ, շտաբի պետ Թոֆիկ Հուսեյնովը հանդես է եկել՝ 2022 թվականի ծառայողական և մարտական գործունեության արդյունքների վերաբերյալ զեկույցով։ Նա ասել է, որ տարվա ընթացքում Ներքին զորքերը ներգրավված են եղել հասարակական կարգի պահպանման և հասարակական անվտանգության ապահովման գործում՝ «Տեխնոֆեստ Ադրբեջան» փառատոնի, «Ֆորմուլա 1» Ադրբեջանի Գրան պրի մրցումների և այլ կարևոր միջազգային մակարդակի միջոցառումների ժամանակ։ Թոֆիգ Հուսեյնովն ընդգծել է, որ ներքին զորքերը հաջողությամբ կատարել են միջազգային միջոցառումների անցկացման ժամանակ իրենց վրա դրված բոլոր ծառայողական և մարտական խնդիրները։

Անցած տարվա ընթացքում ներքին զորքերում մարտական պատրաստությունն իրականացվել է համապատասխան հրահանգի պահանջների հիման վրա, ապահովվել է զինծառայողների որակավորման, կրակային և ֆիզիկական պատրաստվածության մակարդակի բարձրացումը։ Ներքին զորքերի զորամասերի և ոստիկանության տարածքային մարմինների համատեղ աշխատանքը բարելավելու նպատակով կազմակերպվել են համատեղ հատուկ մարտավարական վարժանքներ։ Նշվել է նաև, որ անցած տարվա ընթացքում ներքին զորքերում հետևողականորեն շարունակվել են՝ նյութատեխնիկական բազայի ամրապնդման, զորանոցների և անձնակազմի կենցաղային պայմանները ժամանակակից չափանիշներին համապատասխանեցնելու միջոցառումները։