Ինչպես հաղորդում է Zinvor.info-ն, այս մասին նախագահ Իլհամ Ալիևն ասել է մայիսի 4-ին՝ Զանգիլանի շրջանում հատուկ ներկայացուցիչ Վահիդ Հաջիևի հետ տեսաձևաչափով հանդիպման ժամանակ՝ նրա նշանակման հետ կապված։

«Ադրբեջանով ապրանքներ տեղափոխել ցանկացողների թիվն ու այդ ապրանքների ծավալն աճում է։ Իհարկե, Զանգեզուրի միջանցքը լրացուցիչ հնարավորություններ կստեղծի մեզ և հարևան պետությունների համար»,- հավելել է նախագահը։

Իլհամ Ալիևն անդրադարձել է նաև ազատագրված տարածքներում գյուղատնտեսական պարկերի ստեղծմանը։

«Ազատագրված տարածքներում առաջին գյուղատնտեսական պարկը ստեղծվում է Զանգիլանի շրջանում։ Վստահ եմ, որ ազատագրված հողատարածքներում կլինեն բազմաթիվ գյուղատնտեսական պարկեր»,- ասել է պետության ղեկավարը։

«Զանգիլանում գյուղատնտեսության զարգացման մեծ հնարավորություններ կան։ Ես արդեն մի քանի միտք արտահայտել եմ։ Սակայն պետք է մանրակրկիտ ուսումնասիրել մարզի ողջ գյուղատնտեսական ներուժը, պետք է առաջարկություններ արվեն այնտեղ վերադարձող նախկին հարկադիր վերաբնակների համար»,- նշել է նախագահը։

Այնուհետև նա անդրադարձել է Զանգիլանի շրջանի զբոսաշրջային ներուժի հարցին։

«Զանգիլանի շրջանի զբոսաշրջային հնարավորությունները պետք է մանրակրկիտ վերլուծվեն, մենք պետք է հրատապ աշխատանք սկսենք»,- ընդգծել է Իլհամ Ալիևը։