Այս մասին ԱԺ նիստում կառավարության ծրագրի քննարկմանը հայտարարեց «Հայաստան» խմբակցության պատգամավոր Գեղամ Մանուկյանը:

Նա չհստակեցրեց՝ ում մասին է խոսքը, սակայն խոստացավ, որ իրավապահ մարմիններին տեղյակ կպահի:

Մանուկյանն անդրադարձավ Կառավարության գործունեության ծրագրում բանակին առնչվող մի շարք մատնանշումներին՝ ասելով.

«Մի քանի օր շարունակ իշխանական քարոզչամեքենան աշխատեցնում է երկու թեզ՝ ծառայության ժամկետը կրճատվելու է, սահմանում սահմանապահ զորքերն են լինելու: Սիրելի՛ հայրենակիցներ, ով մի պահ մտածել է՝ «ինչ լավ է, իմ տղան շուտով առաջնագծում դիրքի չի կանգնելու, ապագայում որ բանակ գնա, 2 տարի չի ծառայելու», ուշադիր կարդացեք կառավարության ծրագիրը՝ «աստիճանաբար անցում կկատարվի արհեստավարժ, պրոֆեսիոնալ բանակի, էականորեն կփոխվի ժամկետային զորահավաքային զինծառայության կառուցվածքը: Այս խոստումն այս տարվա, մյուս տարվա համար չէ»,-ասաց նա:

Այնուհետ պատգամավորն ընդգծեց այն ձևակերպումը, թե հեռանկարում ՀՀ պետական սահմանների այն հատվածների պահպանությունը, որն այժմ իրականացնում է ՀՀ ԶՈՒ-ն, կիրականացնեն սահմանապահ զորքերը:

«Սիրելի՛ հայրենակիցներ, ձեր զավակներն էլի մարտական դիրք են պահելու, սա ապագայի համար է գրված: Մեր սահմանապահ զորքերի կառուցվածքն ամբողջովին այլ է եղել, հայ-վրացական սահման պահելու համար է եղել, ոչ թե թշնամու դեմ Գեղարքունիքում կամ Սյունիքում դիրք պահելու համար: ԱԽ՝ «տարած-հետ բերած» քարտուղար Արմեն Գրիգորյանը, որ Հանրայինի եթերում ասում է՝ այս ենք անելու, այն ենք անելու, այս տարվա, մյուս տարվա համար չէ: Չգիտեմ՝ քանի տարի հետո կլինի, բայց, դատելով այս կառավարության՝ անցնող երեք տարվա գործունեությունից, կարծում եմ՝ դժվար էլ իրականացվի»,-ասաց նա: