Մենք կորցնում ենք մեր պետությունը. Հակոբյան

13:36 21 08 2021

«Որոշումներն ընդունողները տարբեր են՝ Մոսկվայի ներկայացուցիչներն են, Անկարայի, Բաքվի, իսկ հայկական իշխանություն կոչվածը կյանքի է կոչում այն որոշումները, որոնք հակահայկական են, հակապետական և ապազգային, և դրանք ներկայացնում է որպես դարակազմիկ»,- քիչ առաջ հրավիրած մամուլի ասուլիսի ժամանակ հայտարարեց «Ազգային օրակարգ» կուսակցության նախագահ Արա Հակոբյանը՝ խոսելով Փաշինյանի կառավարության նիստի ընթացքում արած այն հայտարարության մասին, թե տարածաշրջանում խաղաղության նոր դարաշրջան պետք է բացվի։

«Մենք կորցնում ենք մեր պետությունը, մեր ինքնիշխանությունը, Հայաստանի հետ կապված որոշումներն ընդունվում են առանց Հայաստանի մասնակցության։ Փաշինյանի ընկալմամբ` խաղաղությունը նշանակում է ընդունել պատերազմում պարտության արդյունքները՝ որպես վերջնական։

Մենք ընդունում ենք, որ 44-օրյա պատերազմում պարտություն ենք ունեցել, բայց չենք ընդունում, որ այդ արդյունքները վերջնական են։ Իսկ Փաշինյանի ընկալմամբ՝ այդ արդյունքները վերջնական են, մենք այլևս Ղարաբաղի խնդիր չունենք, դա արդեն մեզնից դուրս է, մենք այլևս չենք ունենալու սահմանների խնդիր մեր թշնամի պետությունների հետ, սահմանազատման ու սահմանագծման արդյունքում ճանաչելու ենք ԽՍՀՄ-ի օրոք ուրվագծված սահմանները, որոնք, այլ կերպ ասած, Լենին-Աթաթուրք սահմաններն են, և, ի վերջո, նոյեմբերի 9-ին ստորագրված կապիտուլյացիոն փաստաթղթի իրականացումն ենք շարունակելու, ինչը նշանակում է նաև Ադրբեջանի և Թուրքիայի տարածքային ամբողջականության ճանաչում և հրաժարում մեր ազգային հավակնություններից՝ կապված Արցախի, Նախիջևանի, ցեղասպանության, հայրենազրկման հետևանքների վերացման հետ»,- պնդեց նա։

Zinvor.info

Հեշթեգներ. Հայաստան

Նման լուրեր