AIA Global կայքը ներկայացնում է իսրայելական պարբերականներում հրապարակված հոդվածներից հատվածներ։ Zinvor.info-ն ընթերցողների ուշադրությանմ է ներկայացնում այդ հատվածների թարգմանությունը։

Առաջատար իսրայելական էլեկտրոնային պարբերականներից մեկը՝ Walla-ն, մեջբերել է Բաքվում գտնվող վրացի սեֆարդ հրեաների կրոնական համայնքի նախագահ Զամիր Իսաևի խոսքերը. «Երբ Թրամփի նման համաշխարհային առաջնորդը գովաբանում է Ադրբեջանի նախագահին, մենք՝ հրեաներս, հատուկ հպարտություն ենք զգում։ Ադրբեջանը հայտնի է հրեաների, կրոնի և ավանդույթների նկատմամբ իր հարգանքով։ Նման գլոբալ ճանաչումը ամրապնդում է մեր պատմական կապերը ադրբեջանական ժողովրդի հետ»։

Իր հերթին, Kikar լրատվական կայքը նշել է. «Սա, հնարավոր է, առաջին դեպքն է, որ Թրամփը կիսվում է օտարերկրյա առաջնորդի ելույթով և այն լուսաբանում այդքան դրական լույսի ներքո՝ անսովոր քայլ, որը մատնանշում է երկու առաջնորդների միջև հատուկ հարաբերությունները: Սակայն Թրամփը միակը չէ: ԱՄՆ Սենատում կան նաև այնպիսիք, ովքեր Ադրբեջանին համարում են Իսրայելի ռազմավարական գործընկեր և, հետևաբար, Ամերիկայի բարեկամ երկիր»:

Israel National News - Arutz Sheva (Channel 7) հեռուստաալիքը հաղորդել է. «Մինչ ԱՄՆ վարչակազմը վերագնահատում է իր ազդեցությունը Արևելյան Եվրոպայում և Կենտրոնական Ասիայում, Ադրբեջանը ամրապնդում է իր դիրքերը և շարունակում է հաստատվել ոչ միայն որպես Իսրայելի գործընկեր, այլև որպես առանցքային խաղացող նոր աշխարհաքաղաքական լանդշաֆտում»:

«Kol BaRama» ռադիոկայանը, որը համարվում է ՇԱՍ կուսակցության ոչ պաշտոնական խոսափողը, նույնպես մեջբերել է ռաբբի Զամիր Իսաևին: