Ինչպես հաղորդում է Zinvor.info-ն, այս մասին ասվում է գերմանական Berliner Zeitung պարբերականի վերլուծական հոդվածում։

«Վերջին տասնամյակի ընթացքում Բաքուն իրեն հաստատել է որպես կարևոր աշխարհառազմավարական խաղացող։ Խոսքը միայն նավթի և գազի մասին չէ։ Ադրբեջանը դարձել է միջազգային դիվանագիտության կենտրոն. նույնիսկ ԵՄ-ն և ՆԱՏՕ-ն Բաքվին անվանում են «հուսալի գործընկեր», նշվում է հոդվածում։

Հեղինակը պնդում է, որ Ադրբեջանը ձգտում է դառնալ տարածաշրջանային տերություն. «Ադրբեջանը ձգտում է դառնալ տարածաշրջանային տերություն, ինչպես Լեհաստանը Արևելյան Կենտրոնական Եվրոպայում, Բրազիլիան Հարավային Ամերիկայում կամ Ինդոնեզիան Հարավարևելյան Ասիայում: Սա դրսևորվում է Ադրբեջանին շրջապատող տարածաշրջանային գերիշխանների հետ նրա հարաբերություններում»:

Հոդվածում նշվում է, որ Ադրբեջանը փորձում է հմտորեն օգտագործել իր աշխարհաքաղաքական դիրքը որպես կամուրջ Արևելքի և Արևմուտքի միջև։ «Մինչ Ուկրաինան, Բելառուսը, Մոլդովան և Վրաստանը ձախողվել են ԵՄ-ի և Ռուսաստանի միջև մանևրելու իրենց փորձերում, Բաքուն ցանկանում է ներգրավված լինել բոլոր գործընթացներում: COP29-ի, Եվրատեսիլ երգի մրցույթի և ՈՒԵՖԱ-ի Եվրոպայի ֆուտբոլի առաջնության նման գլոբալ միջոցառումները ցույց են տալիս, որ աշխարհն Ադրբեջանին կարիքն ունի: (...) Այսօր Բաքուն մոտավորապես նույնն է, ինչ Վիեննան էր Սառը պատերազմի ժամանակ. դիվանագիտական գործողությունների թատերաբեմ և աշխարհաքաղաքական շահերի կենտրոն», - ասվում է հոդվածում:

Հոդվածում նաև ընդգծվում է Ադրբեջանի կարևոր դերը որպես էներգամատակարար՝ ինչպես Գերմանիայի, այնպես էլ ամբողջ ԵՄ-ի համար։