Ինչպես հայտնում է Zinvor.info-ն, միջոցառումը կազմակերպել են Ուկրաինայի Ադրբեջանցիների միացյալ կոնգրեսը և Գալիսիայի երիտասարդական միությունը՝ «Լվով քաղաքի համակարգող-մեթոդական կենտրոնը»։ Միջոցառմանը մասնակցել են սփյուռքի ներկայացուցիչներ Ուկրաինայի տարբեր մարզերից, Լվովի հասարակայնության ներկայացուցիչներ, զինվորականներ և երիտասարդներ։

Նախ մեկ րոպե լռությամբ հարգել են Խոջալուի ողբերգության զոհերի հիշատակը։ Ադրբեջանի և Ուկրաինայի պետական օրհներգների կատարումից հետո ցուցադրվել է Խոջալուի ցեղասպանության և ուկրաինական պատերազմի մասին պատմող տեսանյութ։

Ուկրաինայի ադրբեջանցիների միացյալ կոնգրեսի երիտասարդության և սպորտի վարչության ղեկավար Շահրիյար Մահարրամովը միջոցառման մասնակիցներին մանրամասն տեղեկություններ է տրամադրել Խոջալուում տեղի ունեցած դաժան հանցագործությունների մասին։ Նա ընդգծել է, որ Կոնգրեսն ակտիվորեն ներգրավված է «Արդարություն Խոջալուին» միջազգային արշավում, որն իրականացվում է տարբեր երկրներում Հեյդար Ալիևի Հիմնադրամի փոխնախագահ Լեյլա Ալիևայի նախաձեռնությամբ։

Շահրիյար Մահարրամովն ընդգծել է Խոջալուի ցեղասպանության միջազգային ճանաչման կարևորությունը և նշել, որ մի շարք երկրների խորհրդարաններ և միջազգային կազմակերպություններ արդեն ճանաչել են Խոջալուի ցեղասպանությունը։ Մասնավորապես, համապատասխան բանաձևեր են ընդունել Իսլամական համագործակցության կազմակերպության Խորհրդարանական միությունը, Մեքսիկայի, Պակիստանի, Ինդոնեզիայի, Կոլումբիայի, Պանամայի, Պարագվայի, Հոնդուրասի, Աֆղանստանի, Գվատեմալայի և Ջիբութիի խորհրդարանները։