Zinvor.info-յի փոխանցմամբ՝ այս մասին ասված է Ադրբեջանի արտաքին գործերի նախարարության հայտարարության մեջ։ «Հայկական կողմի ցանկացած միջամտություն Ադրբեջանի կողմից իր ինքնիշխան տարածքում սահմանային անցակետ ստեղծելու հարցում ոտնձգություն է՝ Ադրբեջանի ինքնիշխանության և տարածքային ամբողջականության դեմ, և նման գործողությունները հակասում են միջազգային իրավունքի բոլոր նորմերին և սկզբունքներին։

Ըստ երևույթին, անցակետի ստեղծումը անհանգստացնում է Հայաստանին, որը ագրեսիա է իրականացրել Ադրբեջանի դեմ և շուրջ 30 տարի օկուպացիայի տակ է պահել մեր հողերը, քանի որ այժմ չի կարող այդ ճանապարհն օգտագործել իր անօրինական գործունեության և իրավիճակը սրելու համար։ Ստեղծվել են բոլոր պայմանները ԱՀ Ղարաբաղի տարածաշրջանի հայ բնակիչների կողմից անցակետը թափանցիկ, անվտանգ և կանոնավոր հատելու համար, և հայտնի է, որ անցակետի ստեղծումից ի վեր հարյուրավոր բնակիչներ ազատորեն օգտվել են այս ճանապարհից։ .

Հունիսի 15-ին սահմանային անցակետի և մեր սահմանապահների նկատմամբ հայկական կողմից իրականացված սադրանքի նպատակն է՝ ստվեր գցել անցակետի հաջող գործունեության վրա, խոչընդոտել սահմանային անցակետի անվտանգ և ազատ օգտագործմանը։

Ադրբեջանի Պետական սահմանապահ ծառայության զինծառայողի վիրավորման հետևանքով իրականացված հարձակումից հետո՝ սահմանային անցակետի անվտանգությունն ապահովելու համար Ադրբեջանի ձեռնարկած միջոցառումները «շրջափակում» անվանելը և այս սադրանքի պատճառները հետաքննելը լիովին անընդունելի է:

Մենք պահանջում ենք Հայաստանից, անհիմն հայտարարություններ անելու փոխարեն, զերծ մնալ սադրանքներից, պատասխանատու և կառուցողական մոտեցում ցուցաբերել խաղաղության համաձայնագրի բանակցություններին և տարածաշրջանում հաղորդակցությունների ապաշրջափակման հարցին, կատարել Եռակողմ հայտարարությունից բխող պարտավորությունները՝ ներառյալ ադրբեջանական տարածքներից իր ուժերի ամբողջական դուրսբերումը, ձեռնպահ մնալ՝ Ադրբեջանի տարածքային ամբողջականության և ինքնիշխանության դեմ ուղղված քայլերից»,- նշել են ԱԳՆ-ում։