Այս մասին, ըստ Zinvor.info-յի, ասված է Ադրբեջանի արտաքին գործերի նախարարության մամուլի ծառայության 2022թ. արդյունքներին նվիրված հաղորդագրության մեջ:

Այդ շրջանակներում Ադրբեջանը այս տարվա փետրվարին պատրաստել և Հայաստանին է ներկայացրել խաղաղության պայմանագրի հիմնարար սկզբունքները, իսկ 2022 թվականի հոկտեմբերի 2-ին Ժնևում կայացել է Ադրբեջանի և Հայաստանի պատվիրակությունների հանդիպումը՝ խաղաղության պայմանագրի տեքստը քննարկելու նպատակով։ Որպես առաջընթաց կարելի է նշել նաև երկու կողմից սահմանի սահմանազատման հանձնաժողովների ստեղծումը և երկկողմանի հիմունքներով այդ հանձնաժողովների նիստերի անցկացումը։

Ադրբեջանի և Հայաստանի ղեկավարների միջև, ընդհանուր առմամբ, անցկացվել է 7 հանդիպում, 2022 թվականի ապրիլի 6-ին, մայիսի 22-ին և օգոստոսի 31-ին Բրյուսելում՝ Եվրախորհրդի նախագահ Շառլ Միշելի մասնակցությամբ, վիրտուալ հանդիպում Շառլ Միշելի և Ֆրանսիայի նախագահ Էմանուել Մակրոնի մասնակցությամբ՝ 2022 թվականի փետրվարի 4-ին, հոկտեմբերի 6-ի Պրահայի հանդիպումը և հոկտեմբերի 31-ի Սոչիի հանդիպումը՝ Ռուսաստանի առաջնորդի մասնակցությամբ:

Ընդհանուր առմամբ, չնայած տարվա ընթացքում Հայաստանի և Ադրբեջանի միջև հետկոնֆլիկտային շրջանում հարաբերությունների կարգավորման գործընթացում երկկողմ շփումների մասնակի դինամիկայի առկայությանը՝ նորմալացման բոլոր երեք ուղղություններով ձեռք բերված առաջընթացը չարդարացրեց սպասելիքները:

Դրա հիմնական պատճառը Հայաստանում հարաբերությունների կարգավորմանն ուղղված իրական քայլերի համար անհրաժեշտ քաղաքական կամքի բացակայությունն է, նրա հակասական ու անհետևողական դիրքորոշումը, ձեռք բերված պայմանավորվածությունների և ստանձնած պարտավորությունների կատարումից խուսափելու մշտական փորձերը, մասնավորապես, այն, որ Երևանը դիմում է քաղաքական և ռազմական սադրանքների՝ նորմալացման գործընթացը խաթարելու նպատակով։ Դրան զուգահեռ, նկատվում է խաղաղության պայմանագրի տեքստի համաձայնեցման գործընթացը ձգձգելու միտում: