Ինչպես Zinvor.info-յին հայտնել են ԱԳՆ-ից, չնայած այս կառույցը Ադրբեջանի դեմ մանիպուլյացիա անելու համար օգտագործելու Հայաստանի փորձերին՝ ՄԱԿ-ի Անվտանգության խորհրդում քննարկումները դարձել են Ադրբեջանի հիմնավոր մտավախությունների արտահայտման հերթական հարթակը, մասնավորապես՝ Հայաստանի կողմից նոյեմբերի 10-ի եռակողմ հայտարարության շրջանակներում ստանձնած պարտավորությունների կանխամտածված, մշտական և անուղղելի խախտումների հետ կապված, ինչպես նաև այս մասին համաշխարհային հանրությանը լայնորեն տեղեկացնելու առումով։

Իր հայտարարության մեջ Ադրբեջանի ներկայացուցիչը հերքել է Ադրբեջանի կողմից Լաչինի ճանապարհի իբր փակման, «շրջափակման» և հայ բնակիչների համար «մարդասիրական աղետի» առաջացման մասին Հայաստանի բոլոր մեղադրանքները՝ ընդգծելով, որ բոլոր այս մեղադրանքները բացարձակապես անհիմն են և չեն համապատասխանում իրականությանը: Հայտարարության մեջ նշվում է, որ ոչ Ադրբեջանի կառավարությունը, ոչ էլ ցուցարարները չեն փակել Լաչինի ճանապարհը։

«Ճանապարհին քաղաքացիների, տրանսպորտային միջոցների և բեռների տեղաշարժի ռեժիմը մնում է անփոփոխ, և խաղաղապահները շարունակում են կատարել իրենց պարտականությունները՝ կարգավորելով ճանապարհով երթևեկությունը։ Սոցցանցերում հրապարակված տեսանյութերն ապացուցում են տրանսպորտի տարբեր տեսակների, այդ թվում՝ շտապօգնության մեքենաների և մարդասիրական օգնության քարավանների անարգել անցումը։

Իրավիճակի հումանիտար հետևանքների մասին պնդումները նույնպես կեղծ են։ Տեղի բնակիչներին ապրանքների մատակարարման կամ անհրաժեշտ բժշկական ծառայությունների մատուցման համար խոչընդոտներ չկան։ Անցած օրերին Կարմիր խաչի միջազգային կոմիտեի (ԿԽՄԿ) ավտոշարասյունները ճանապարհով անցել են առանց դժվարության։ Ադրբեջանի կառավարությունը բազմիցս հայտարարել է իր պատրաստակամության մասին՝ անհապաղ հոգալու բոլոր հումանիտար կարիքները, որոնց կարող են բախվել հայ բնակիչները։ Այդ նպատակով Ադրբեջանի կառավարությունը սերտ կապի մեջ է ԿԽՄԿ-ի տեղական ներկայացուցչության հետ:

Ելույթում նշվում է նաև, որ Հայաստանը չի կատարում ռազմական գործողությունները դադարեցնելու և բոլոր զինված կազմավորումները Ադրբեջանի տարածքից դուրս բերելու իր պարտավորությունները, չարաշահում է Լաչինի ճանապարհը՝ անօրինական ռազմական և այլ գործողությունների համար, այդ թվում՝ ադրբեջանական ռեսուրսների անօրինական տեղափոխման համար։ Հակառակ եռակողմ հայտարարությանը՝ Հայաստանը շարունակում է անօրինական ռազմական գործողությունները Ադրբեջանի տարածքում, դուրս չի բերում իր ուժերը Ադրբեջանի տարածքից, շարունակում է մեծ քանակությամբ հակահետևակային ականներ տեղադրել Ադրբեջանի տարածքում, այդ թվում՝ 2021թ. արտադրված, ինչը հանգեցնում է զոհերի թվի աճին:

Միևնույն ժամանակ, խորը մտահոգության տեղիք է տալիս այն փաստը, որ ՄԱԿ-ի Անվտանգության խորհրդի անդամ որոշ երկրներ շարունակում են կողմնակալ և միակողմանի դիրքորոշում ցուցաբերել։ Հատկապես մտահոգիչ է Ադրբեջանի տարածքի բաղկացուցիչ մասի ոչ ճիշտ անվանումը։ Ինչպես նշվել է քննարկումների ժամանակ, Ադրբեջանը մերժում է դա որպես միջամտություն իր ներքին գործերին, ինչպես նաև աշխարհագրական անվանումների օգտագործման վերաբերյալ ՄԱԿ-ի համապատասխան պահանջների խախտում։ Ադրբեջանը ևս մեկ անգամ կոչ է անում այդ երկրներին պահպանել ՄԱԿ-ի կանոնադրությունից և միջազգային իրավունքից բխող պարտավորությունները, զերծ մնալ Ադրբեջանի ինքնիշխանության և տարածքային ամբողջականության դեմ ուղղված ցանկացած հայտարարությունից»,- ասված է ԱԳՆ հայտարարության մեջ։