Այս մասին հայտնում է Zinvor.info-ն՝ հղում անելով Ադրբեջանի ԱԳՆ մամուլի ծառայությանը։

Հանդիպումը կազմակերպվել է խաղաղության պայմանագրի տեքստի մշակման վերաբերյալ հանձնարարականի համաձայն, որը ԱԳ նախարարներին տրվել է 2022 թվականի օգոստոսի 31-ին Բրյուսելում Ադրբեջանի Հանրապետության նախագահ Իլհամ Ալիևի և Հայաստանի Հանրապետության վարչապետ Նիկոլ Փաշինյանի հանդիպման արդյունքներով՝ Եվրամիության խորհրդի նախագահ Շառլ Միշելի մասնակցությամբ։

Նախարար Ջեյհուն Բայրամովն ընդգծել է ջանքերի կենտրոնացման կարևորությունը հետհակամարտային շրջանում միջպետական հարաբերությունների կարգավորման և Ադրբեջանի և Հայաստանի միջև խաղաղության պայմանագրի ստորագրման վրա։ Այս առումով նախարարը հայկական կողմի ուշադրությանը հրավիրել է ադրբեջանական կողմի առաջարկած հինգ հիմնարար սկզբունքների վրա հիմնված համաձայնագրի տարրերի վրա:

Հանդիպման ընթացքում, հաշվի առնելով չսահմանազատված սահմանին լարվածությունը, Ադրբեջանն առաջարկել է սահմանազատման հարցերով երկկողմ հանձնաժողովի հաջորդ նիստն անցկացնել ոչ թե նոյեմբերին, ինչպես ավելի վաղ պայմանավորվել էին, այլ այս տարվա հոկտեմբերին։

Նախարար Ջեյհուն Բայրամովն ընդգծել է Ադրբեջանի, Հայաստանի և Ռուսաստանի ղեկավարների կողմից ստորագրված եռակողմ հայտարարություններին համապատասխան Ադրբեջանի տարածքից հայկական զինված ուժերի ամբողջական դուրսբերման, տրանսպորտային և կոմունիկացիոն գծերի հնարավորինս արագ բացման անհրաժեշտությունը:

Անդրադառնալով հումանիտար հարցերին՝ նախարարը, ի թիվս այլ հարցերի, նշել է գրեթե 4000 անհետ կորած ադրբեջանցիների ճակատագրի պարզաբանման կարևորությունը, նա ընդգծել է, որ հայկական կողմը շարունակում է ականներ տեղադրել Ադրբեջանի տարածքներում, ինչն անթույլատրելի է և բազմաթիվ զոհերի պատճառ է դարձել։

Ջեյհուն Բայրամովը վերահաստատել է Ադրբեջանի հանձնառությունը տարածաշրջանում խաղաղության և կայունության ապահովմանը և խաղաղության պայմանագիր ստորագրելու պատրաստակամությունը։ Պայմանավորվածություն է ձեռք բերվել շարունակել քննարկումներն այս ուղղությամբ։