Այս մասին օգոստոսի 19-ին կայացած ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան:

«Անվերապահ առաջնահերթություն է 2020 թվականի նոյեմբերի 9-ի եւ այս տարվա հունվարի 11-ի Ռուսաստանի, Ադրբեջանի եւ Հայաստանի ղեկավարների եռակողմ համաձայնագրերի իրականացումը: Բաքվի եւ Երեւանի հետ ամենաբարձր եւ բարձր մակարդակով շփումներն իրականացվում են պարբերաբար: Ամառվա ընթացքում Մոսկվայում հուլիսի 7-ին կայացել է Ռուսաստանի նախագահի հանդիպումը Հայաստանի վարչապետի, իսկ հուլիսի 20-ին՝ Ադրբեջանի նախագահի հետ: Անհրաժեշտ աշխատանքները շարունակաբար տարվում են արտաքին քաղաքականության, պաշտպանության, սահմանապահ գերատեսչությունների գծով, դեսպանություններն ակտիվորեն աշխատում են:

Ձեւաչափերը քննարկվում են կողմերի հետ, եւ որոշումները կայացվում են` ելնելով հանդիպման առավել արդյունավետությունից եւ գործի օգտակարության համար դրա ձեւաչափից: Որոշ հարցերի քննարկումների մանրամասները, հաշվի առնելով հատուկ զգայունությունն ու խնդիրները, ներառյալ անվտանգությունը, միշտ չէ, որ հրապարակվում են: Դա կարող է խանգարել կայուն արդյունքի հասնելուն»,- նշել է Զախարովան:շ

ՌԴ ԱԳՆ պաշտոնական ներկայացուցիչն ընդգծել է առճակատման, հատկապես ռազմատենչ հռետորաբանության բացարձակ անարդյունավետությունը, որին երբեմն դիմում են Անդրկովկասի երկրների քաղաքական գործիչները: Նրա գնահատականով՝ դա վնաս է հասցնում գլխավոր հարցին` կայուն արդյունքի հասնելուն: «Թե ինչի է ուղղված արդյունքը, դուք գիտեք: Ամեն ինչ ամրագրված է այսօր իմ կողմից հիշատակված համաձայնագրերում: Ե՛ւ Բաքուն, եւ՛ Երեւանը, ընդհանուր առմամբ, բարձր են գնահատում մեր երկրի կայունացնող դերը՝ ռուսական խաղաղապահ զորախմբին, որը տեղակայված է Լեռնային Ղարաբաղում՝ կողմերի շփման գծի երկայնքով եւ Լաչինի միջանցքի երկայնքով: «Տեղում» մեր խաղաղապահների գործողությունների շնորհիվ իրավիճակը տարածաշրջանում զգալիորեն բարելավվել է, այն մնում է համեմատաբար հանգիստ: Իրենց տներ վերադարձած փախստականների մասին տվյալները պարբերաբար տեղադրվում են մեր երկրի պաշտպանության նախարարության կայքում, եւ առանձին միջադեպերը հաջողվում է անհապաղ լուծվել աշխատանքային կարգով:

Դրանց առաջացման պատճառն, անկասկած, Բաքվի եւ Երեւանի հարաբերություններում վստահության սուր անբավարարությունն է: Ռուսաստանը հանդես է գալիս Բաքվի եւ Երեւանի հարաբերությունների համակողմանի բարելավման օգտին, եւ մենք, իհարկե, այս դիրքորոշումը հասցնում ենք եւ՛ Բաքվին, եւ՛ Երեւանին, այդ թվում՝ ամենաբարձր, բարձր մակարդակներում: Մենք կոչ ենք անում երկու կողմերին հնարավորինս շուտ վերացնել հումանիտար ոլորտում փոխադարձ գրգռիչները, փոխանակել ռազմագերիներին «բոլորը բոլորի դիմաց» բանաձեւով եւ ականապատ դաշտերի քարտեզներն ամբողջ ծավալով»,- ընդգծել է Մարիա Զախարովան:Զախարովա. Ռուսաստանը պատրաստ է աջակցել սահմանի սահմանազատմանը

Ռուսաստանի Դաշնությունը պատրաստ է աջակցել Հայաստանի եւ Ադրբեջանի միջեւ սահմանի սահմանազատմանը:

Այս մասին օգոստոսի 19-ին կայացած ճեպազրույցին հայտարարել է Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովան:

Պատասխանելով հայ-ադրբեջանական սահմանին իրավիճակի սրման մասին հարցին՝ Զախարովան ընդգծել է, որ ռուսական կողմը բազմիցս դիմել է Երեւանին եւ Բաքվին՝ ուժ կիրառելուց զերծ մնալու եւ բացառապես քաղաքական եւ դիվանագիտական ​​միջոցներով լարվածությունը նվազեցնելու կոչով: Շեշտվել է ներկայիս պայմաններում առճակատման հռետորաբանության կիրառման հակաարդյունավետությունը: Եվ մենք շարունակում ենք ելնել նրանից, որ երկարաժամկետ լուծումը սահմանի սահմանազատման շուրջ բանակցությունների մեկնարկն է՝ դրանց հետագա սահմանագծմամբ: Մենք պատրաստ ենք անհրաժեշտ խորհրդատվական աջակցություն ցուցաբերել այս գործընթացին, ասել է Զախարովան:

«Ինչ վերաբերում է եռակողմ աշխատանքային խմբին՝ Ռուսաստանի Դաշնության, Ադրբեջանի եւ Հայաստանի փոխվարչապետների համատեղ համանախագահությամբ, ինչպես հավանաբար արդեն տեսաք, հաղորդումներ են հրապարակվել այն մասին, որ օգոստոսի 17-ին նա վերսկսել է իր գործունեությունը: Նիստը տեղի է ունեցել Մոսկվայում, համապատասխան տեղեկատվությունը տեղադրված է Ռուսաստանի Դաշնության կառավարության կայքում, եւ մենք գոհունակությամբ նշում ենք, որ կողմերին հաջողվել է վերադառնալ Հարավային Կովկասում տնտեսական եւ տրանսպորտային կապերի ապաշրջափակման մոտեցումների պրակտիկ քննարկմանը: Մեր տեսանկյունից դա կոչված է նպաստել այս տարածաշրջանի զգալի տնտեսական ներուժի բացահայտմանը»,- ասել է Մարիա Զախարովան: