Ինչպես հայտնում է Zinvor.info-ն, այս մասին լրագրողների հետ զրույցում ասել է ՀՀ Ազգային ժողովի պաշտպանության և անվտանգության հարցերի մշտական հանձնաժողովի փոխնախագահ Արմեն Խաչատրյանը։

«Ինչո՞ւ այս տարածաշրջանում 44-օրյա պատերազմից հետո Հայաստանը հայտարարեց, որ գնում է դեպի խաղաղություն, որ մեր երկրին ամենից շատ խաղաղություն է պետք։ Որովհետև պատերազմից հետո մեր ռեսուրսները, երկրի վիճակն ու քաղաքական իրավիճակը սպառնում էին առաջին հերթին Հայաստանին։ Իսկ ինչպե՞ս եք պատկերացնում, որ Հայաստանը հայտարարի, որ չի ճանաչում Ադրբեջանի տարածքային ամբողջականությունը, տարածքներ կան, որ մերն են, և մենք կվերցնենք դրանք։ Սա ուղիղ պատերազմի սկիզբ կլիներ, մի քանի օրից պատերազմ կսկսվեր։ Դե յուրե ողջ աշխարհն ընդունում է, որ Լեռնային Ղարաբաղը Ադրբեջանի տարածքն է։ Սա Ադրբեջանի տարածքն է։ Ո՞վ չճանաչեց Ղարաբաղի հայերի ինքնորոշումը. ոչ ոք:

Կա՞ մեկը, ով կարծում է, որ այսօր այս աշխարհաքաղաքական պայմաններում, այս բանակով, մեր 3 միլիոն բնակչությամբ մենք կարող ենք պատերազմ սկսել այս տարածաշրջանում և հաղթել։ Թե՛ այսօր Հայաստանի առջև ծառացած մարտահրավերները, թե՛ մեզ սպառնացող ուժը միանգամայն անհամեմատելի են, առավել ևս, որ պարզվեց՝ մեր դաշնակիցները միայն թղթի վրա են դաշնակից»,- հայտարարել է Արմեն Խաչատրյանը։

Zinvor.info